What DAPak?

Kasunod ng pag po-proklama ng pinakamataas na korte sa kapuluan na ang DAP o yung pondong ipinamigay ng Malakanyang para makatulong sa proyekto ng mga senador na nagkakahalaga nang mula PHP40,000,000 hanggang PHP100,000,00,  sunod-sunod din ang mga sushestiyon,  aksyon at mga tangang palagay mula sa iba’t ibang saray ng lipunan.

Isang congressman mula sa Negros na alyado ng Malakanyang ang nagsabing pre-mature at walang basehan ang ang panukalang i-impeach si Pnoy. Bumuwelta pa at sinabing malaki ang naitulong ng pamimigay ng DAP sa ating ekonomiya, marami daw naipatayong imprastraktura sa ngalan nito, na sinasang ayunan naman ni Ted Failon.

Pero, iyon ba ang mabigat na tanong dito? Ang pinaguusapan ba dito ay kung nakatulong ang DAP sa ekonomiya? Hindi ba’t ang kinukuwestiyon ay ang legalidad ng DAP?

Para mo na rin kasing sinabing ayos lang magbenta ng cocaine at heroin sa kalye kung ito’y makapag aambag sa paglago ng ekonomiya. Galing ng thought process ni congressman, halatang matalino.

Sabi naman ng kaliwa, na matagal nang pumusisyon na unconstitutional ang DAP, grounds ito para i-impeach ang pangulo, kasama ng ilan pang basehang nabanggit na nila nuong mga nakaraang buwan;

1. EDCA – ang kausunduang anila’y unconstitutional.  Ito’y magpapanatili muli ng mga tropang kano sa Pilipinas.

 2. PDAF scam – dahil sa kakulangan ng aksyon ng Malakanyang sa pag-aabolish nito at pagpapanagot ng  mga sangkot.

3. Walang habas na pagtaas ng bilihin at ang pagkakapako ng suweldo ng ating mga obrero sa minimum wage.

4. Kriminal na kapabayaan ng gobyerno sa nangyari sa Eastern Visayas na dulot ng super typhoon Yolanda.  Pang lima na nga ang sinasabing unconstitutional na DAP.

Para sa kaliwa, malinaw ang mga basehan sa mga gagawin nilang aksyon, hindi mga gawa-gawa ang kaso ang ipinaparatang tulad ng laging ginagawa sa mga kasapian nila. Di rin tulad ng mga trapong walang sariling imik tungkol sa mga isyu, nagkakaisa ang kaliwa sa kanilang mga paniniwala, nariyan ang batayan, eto ang kinakailangang aksyon. Simple, walang ligoy at malinaw ang dapat kalagyan.

Ang hindi malinaw sa akin ay ang kronikong sakit ng ating lipunan. Taun-taon nalang mayroong panibagong isyu tungkol sa malawakang korapsyon sa gobyerno, taun-taon nalang, milyun-milyun o di kaya’y bilyun-bilyon ang ninananakaw sa atin ng mga sindikatong pulitiko. Erap, GMA,Jokjok Bolante, Hello Garci, Benjamin Abalos, FG Arroyo, nasaan na sila?

Ang problema kasi, ginagawa tayong bonus stage ng mga pulitiko, ang dali dali nating lusutan, magkakaroon lang ng bagong isyu, natatabunan na ang luma.

Wala akong pakialam sa pangalan at laung wala sa titulo, kapag magnanakaw, dapat ikulong. Hindi yung binibigyan pa ng priviledged speech na gagamitin lang naman bilang magic sing. Bong Revilla, naiintindihan ko na artista ka, pero, nung nagsenador ka, hindi mo ba naisip na.. Ah leche! Yun na nga, nasabi ko na nuon na mula sa panahon nila C.M. Recto, Lorenzo Tanada at Pepe Diokno, andito na tayo sa panahon nina Lapid, Revilla, at Estrada, na talaga namang ang mga action moves eh nakakabilib. Mula sa Rizal law ni C.M. Recto andito na tayo sa Alyas Pogi ni Bong Revilla.

Balik tayo sa ating mahal na presidente, sa Japan, nag-resign ang kanilang prime minister dahil nakapagbitiw siya ng mga mapangutyang komento tungkol sa kabaklaan, sa South Korea naman, nagbitiw din sa puwesto ang kanilang prime minister dahil 250 katao na ang namatay sa paglubog ng isang vessel na kung tutuusin, wala naman siyang direktang kinalaman, pero dahil sa nalulungkot daw yung mga pamilyang  naapektuhan dahil hindi na-rescue ang karamihan, magreresign nalang siya. 250! Anak ng tokwa! Sa Eastern Visayas, 6,000 mahigit ang namatay, hanggang ngayon wala pang bahay, anong ginawa ng ating mahal na presidente? Isang linggo bago niya nagawang dalawin ang mga lugar na naapektuhan, naunahan pa siya ng mga media na nanggaling pa sa kabilang dulo ng mundo para mamigay ng relief goods, at nung  nagkagulo na ang mga tao dahil walang makain, tinawag pang looters at goons. Anak ng tokwa talaga. Pero ganun talaga, nasa Pilipinas ka eh, chaka sabi din naman ng presidente natin, TAYO NA SA TUWID NA DAAN! Eto na yun tanga, eto na yung sinasabi nyang tuwid na daan, ano bang inaasahan mo?

Di ko naman sinasabing magaling ang gobyerno ng  South Korea at Japan dahil ganun ang ginawa ng presidente nila, pero bilang kapwa asyano nalang na nasa isang kontinente’t rehiyon,  sana man lang, may napulot ang ating mahal na presidente mula sa mga ginawa nila. Pero hindi yata natututo sa karanasan ang ating mahal na presidente dahil pati yung CARP ng kanyang yumaong ina eh ineextend niya, kahit dagsa ang mga magsasakang nagsasabing huwad ang CARP at CARPer.

Alam mo ba yung isinisigaw ng mga nagrarali sa kalye na BURUKRATA KAPITALISMO, IBAGSAK! Parang ang lalim, pero simple lang ang ibig sabihin nun, sabi nila, ang gobyerno daw ay ikinasal na ang pagiging gobyerno sa mga korporasyon, kaya’t pupwede nang gamitin ng mga pulitiko ang gobyerno bilang negosyo upang magpayaman. Sa madaling sabi, ang mga pulitiko ay namumuhunan sa kanilang puwesto para kumita, hindi para magserbisyo. Nga naman, eh parang gusto nilang ipagbili lahat ng state-owned services eh. Sa pagkaka alala ko, ang public service eh libre, tungkuling ibigay yun ng gobyerno, kaya nga sila binuo. Sa private entity, may bayad, at ang pangunahing dahilan ng pagkakatayo nito ay para kumita.

So, ano ngayon itong DAP? Anong gagawin natin ngayon na unconstitutional pala ito? Wala, tatanga, nganganga, ipagpapatuloy ang kani-kaniyang trabaho araw-araw dahil sabi nga nila, tanga, wala ka ng magagawa diyan! Bonus stage ka lang sa mga pulitiko na kayang kaya kang nakawan kahit kelan nila gusto, kaya wag ka ng tumingin, wag ka ng sumali, wala ka rin namang magagawa, hayaan mo nang hanggang sa iyong kamatayan eh pagnakawan ka, wag mo na din gamitin ang utak mo dahil dapat mo lang iyang gamitin sa pag-papayaman ng kumpanya mo. Pasalamat ka nga’t may trabaho ka, di mo naman kasi pinaghihirapan ang sweldo mo, ibinibigay siya ng kumpanya mo ng libre.

Kaya, men, kahit sobrang labo na ng lipunan mo, dapat relax ka pa rin, sabi nga nung isang advertisement sa London, “Keep calm and carry on”. Kalmante lang kahit alam mong mumu lang ang natatanggap mong sweldo sa kumpanyang pinagtatrabahuhan mo, kalmante lang kahit 90% ng trabaho eh sa iyo, pero .0001% lang ng kita ang napupunta sa iyo. Kalma lang, makakaraos ka din. Oh ayun tamo, magpapakasal na yung paborito mong artista, tamo, si Jinggoy takot sa ipis, ayan na, may bagong soap opera si Anne Curtis, oh ayun pa, eto pa, ayun na, ayun na nga.